
काठमाडौं । राजधानीमा जारी शहीद स्मारक ए डिभिजन लिग फुटबलमा सातदोबाटो युथ क्लब विजयी भएको छ ।
दशरथ रंगशाला आज भएको दोस्रो खेलमा सातदोबाटोले विभागीय क्लब एपीएफमाथि ३–० गोलको सहज र शानदार जित दर्ता गरेको हो ।
सातदोबाटोको जितमा दीपक सिंह ठकुरीले २ गोल गर्दा विलियमले १ गोल थपेका थिए । १३ औं मिनेटमा विलियमले गोल गरेपछि सातदोबाटोले अग्रता लियो ।
३६ औं मिनेटमा दीपकले गोल गरेपछि सातदोबाटो पहिलो हाफमा २–० को सहज अवस्थामा रहेको थियो । ७७ औं मिनेटमा दीपकले नै व्यक्तिगत दोस्रो गोल गर्दा सातदोबाटोले ३–० को फराकिलो जित निकाल्न सफल भयो ।
जितपछि सातदोबाटो २६ अंकसहित तालिकाको चौथो स्थानमा रहेको छ भने पराजित भएको एपीएफ २२ अंकसहित सातौं स्थानमा छ ।