केपी ओली कप टी–२० क्रिकेटमा सुदूरपश्चिम प्रदेशले नेपाल पुलिस क्लबलाई ४ विकेटले हराएको छ । सुदूरपश्चिमसँग हारे पनि पुलिस नेटरनरेटका आधारमा समूह ‘सी’ बाट विजेता बन्दै सेमिफाइनलमा पुगेको छ ।
जितका लागि एक सय ५९ रनको लक्ष्य सुदूरपश्चिमले १८ ओभर ४ बलमा ६ विकेट गुमाउँदै भेट्टायो । उसका किरण ठगुन्ना ५१ रनमा अविजित रहे । नरेन साउद ३९ रनमा आउट भए । पुलिसका राशिद खानले ३ विकेट लिए ।
सुनिल धमला र सागर ढकालले एक/एक विकेट लिए । त्यसअघि पोखरा क्रिकेट रङ्गशालामा टस जितेर पहिला ब्याटिङ गरेको पुलिसले २० ओभरमा ४ विकेट गुमाउँदै १ सय ५८ रन बनाएको थियो । पुलिसका कुशल भुर्तेलले सर्वाधिक ६७ रन बनाए पनि टोलीलाई जिताउन सकेनन् । सुनिल धमला ४२ रनमा आउट भए ।
सुदूरपश्चिमका विकाश आग्रीले २ विकेट लिए । भोजराज भट्ट र वसन्त कार्कीले एक/एक विकेट लिए । सुदूरपश्चिम पहिलो खेलमा मधेस प्रदेशसँग ८ विकेटले पराजित भएको थियो । समूह ‘ए’ बाट बाग्मती र समूह ‘बी’ बाट एपीएफ सेमिफाइनलमा पुगिसकेका छन् । अब समूह ‘डी’ बाट त्रिभूवन आर्मी र कोशी प्रदेशमध्ये एक टोली सेमिफाइनलमा पुग्नेछ । आज हुने अर्को खेलमा कोशी प्रदेश र त्रिभूवन आर्मी क्लब खेल्नेछन् । यो खेल दिउँसो १ बजे पोखरामा नै हुनेछ ।
प्रतियोगितामा ७ प्रदेशका ७ वटा टिम, विभागीय टिमहरू नेपाल पुलिस, नेपाल आर्मी, एपीएफ र मदन भण्डारी स्पोर्ट्स एकेडेमीको रातो र निलो गरी १२ टिमको सहभागिता छ । प्रतियोगिताको विजेताले ५ लाख र उपविजेताले २ लाख ५० हजार रुपैयाँ प्राप्त गर्नेछन् ।