काठमाडौं– चलचित्रकर्मी नवल खड्काले चलचित्र ‘काँडेतार’ र ‘सिमानामा काँडेतार अभियान’ का तर्फबाट माघे संक्रान्तिको दिन एउटा प्रेस विज्ञप्ती जारी गर्दै भारतका प्रधानमन्त्री नरेन्द्र मोदीले नेपालको भूमि लिपुलेकमा सडक विस्तार गर्ने घोषणा गरेको समाचारप्रति ध्यानाकृष्ट भएको जनाएका छन् ।
विज्ञप्तीमा चलचित्रकर्मी खड्काले नेपाली भूभागमा भएको हस्तक्षेपका विरुद्ध नेपाली कांग्रेस तर्फबाट महासचिवद्वय तथा एमाले एवं माओवादी केन्द्र दुवै पार्टीका परराष्ट्रमामला विभागका प्रमुखहरुद्वारा विरोध वक्तव्य आएको उल्लेृख गर्दै त्यस्ता प्रतिकृया झारा टार्नका लागि मात्रै भएको तथा त्यसले दलको संस्थागत अडान मान्न नसकिने कुरामा आफ्नो अभियानले प्रष्ट बुझेको उल्लेख गरेका छन् ।
नेपालको सार्वभौम अधिकार र भौगोलिक अखण्डतामाथिको हस्तक्षेप हुँदा व्यक्ति विशेषको नभई संस्थागत अडानको निर्णय र प्रतिकृया आउनु पर्छ’, विज्ञप्तीमा भनिएको छ– ‘त्यसमाथि सरकारले कुन विधि र कुन माध्यमद्वारा प्रतिकृया दिँदैछ थाहा हुन आएको छैन ।’
‘सदन चालु छ, तर सुचारु छैन, विज्ञप्तीमा भनिएको छ–‘दु:खको कुरा मुलुकको सार्वभौम अधिकार एवं भौगोलिक अखण्डतामाथि हस्तक्षेप एवं अतिक्रमण हुँदा सदन चालु गर्न प्रतिपक्ष तयार भएको छैन । सदन चालु नभएका कारण नेपालका जनप्रतिनिधिहरुका आवाज सुन्न सकिएको छैन । तिनीहरुले के कसरी बोल्छन् जनता सुन्न आतुर छन् । विशेषगरी पार्टीको विधिवत बैठक बसी गरेको निर्णय जनता सुन्न चाहन्छन् । जनताले काँग्रेस, एमाले र माओवादीका नेताहरुबीच भइरहेका दोहोरी र छेडछाडीलाई मजाकमात्र मानेका छन् र यस मुद्दालाई बराल्न र आफ्नो संगठन तथा नेतृत्वलाई चोखै राख्न गरिएका हरकत हुन् भन्ने प्रष्ट बुझेका छन् ।’
विज्ञप्तीमा सत्तासिन र सरकार आसिन दलहरुलाई सम्बोधन गर्दै सदन खोल्न तथा पार्टीको औपचारिक बैठक गरी निर्णय गर्न आग्रह गरिएको छ ।
‘सरकार, दलहरु र सदन सबैको प्रतिकृया तुरुन्तै आओस्, ताकी हामीले राष्ट्रवादको सक्कली अनुहार हेर्नु पाऔं, विज्ञप्तीमा भनिएको छ – ‘नेपाली जनताहरु स्वाभिमानी छन् र यसैले भारतीय पक्षबाट भएको अपमान र हस्तक्षेपलाई स्वीकार गर्न सक्दैनन् । यही मनोविज्ञानका कारण नेपालका केही नेता विशेषमा खास मौसममा राष्ट्रवादको खाडो जाग्ने गर्छ । तर सरकारका आसिन र प्रतिक्षारत पार्टीहरुका नेताहरुको राष्ट्रवाद आवश्यक समयमा गायव हुने गर्छ । अहिले यस्तै भएको छ । राष्ट्रवाद चीर निन्द्रामा रहेको प्रतित हुन्छ । तर राष्ट्रवाद दृष्टि हो, यो सधैं जागा रहन्छ, सचेत रहन्छ र अभियानरत हुन्छ । यस्तै बुझ्ने मध्ये सिमानामा काँडेतार अभियान पनि एक हो ।’
निर्देशक तथा अभिनेता खड्काले विज्ञप्तीमा आफ्नो अभियानले हाल भारत सरकारबाट लिपुलेक क्षेत्रमा भैरहेको बाटो विस्तारले नेपालको सार्वभौमिकतामाथि हस्तक्षेप भएको ठानेको र भारतीय कार्यको कडा विरोध गरको उल्लेख छ ।
‘सत्तासिन दलहरु र सरकारमा आसिन तथा प्रतिपक्षमा रहेका सबै दलहरुलाई औपचारिक अडान/निर्णय र सरकारलाई आफुले गरिरहेका पहल तथा प्रतिकृया सार्वजनिक गर्न आव्हान गर्दछ ।’
अभिनेता, निर्माता तथा निर्देशक नवल खड्काले ‘सिमानामा काँडेतार अभियान’ किन ? भन्ने जिज्ञासाको सात वटा बुँदामा जवाफसमेत दिएका छन् ।
खड्काले भनेका छन् :
- नेपालका सँधियार मुलुकहरुबीच बैज्ञानिक रुपमा सिमाङ्कन गराउन ।
- जंङ्गे पिलर र रिफ्रेन्स पिलरहरुको सुरक्षार्थ सरकारलाई निरन्तर दवाव दिन ।
- सीमाको विवाद समाधान गर्न ।
- आवागमनमा ऐतिहासिकता र परम्परालाई मध्यनजर गर्दै नियमित गर्न ।
- सीमा अतिक्रमण हुँदा सरकारलाई उपयुक्त प्रतिक्रिया दिनेगरी सजग हुने अवस्थामा राख्न ।
- सीमाक्षेत्रका बसोबास गर्ने नेपाली नागरिक माथि हुने जघन्य आक्रमण रोक्न तथा सीमाना वारपार गर्ने नेपाली माथि भइरहने बाधा–ब्यवधानको अन्त्य गर्न ।
- आतंकवादी गतिविधी, लागु पदार्थ तथा औषध ओसार-पसार, चेलीबेटी बेचबिखन, तस्करी लगायतका क्रियाकलापहरु रोक्न ।