सोलुखुम्बु – सोलुखुम्बुको जिल्ला अस्पताल फाप्लुलाई ७ लाख बढिको स्वास्थ्य सामाग्री प्राप्त भएको छ । प्रदेश नम्बर १ का सामाजिक विकास राज्य मन्त्री विष्णु तुम्बाहाम्फेले अस्पतालकी निमित्त कार्यालय प्रमुख सानी शेर्पालाई आज ७ लाख ३७ हजार २७१ रुपैँया बराबरको स्वास्थ्य सामाग्री हस्तान्तरण गरेकी हुन् ।
विभिन्न ६ किसिमका सामान अस्पताललाई हस्तान्तरण गरिएको हो । जसमा प्यासेन्ट मोनिटर १ थान, डिजिटल थर्मोमिटर ४० थान, एन्टिजेन किट ७५० थान, ह्यान्ड सेनिटाईजर ५ सय एमएलको ६० थान, उल्स अस्मििटर १० थना, सिपिएपि मेसिन एक थान हस्तान्तरण गरिएको छ । स्वास्थ्य सामाग्री प्राप्त भएपछि उपचारका लागि सहज हुने निमित्त कार्यालय प्रमुख सानी शेर्पाले बताइन् । सामाजिक विकास राज्य मन्त्री समक्ष शेर्पाले अस्पतालमा दक्ष जनशक्तिको अभाव भएको, आवश्यक स्वास्थ्य सामाग्री व्यवस्थापनको माग गरिन् ।
हिमाल एफ.एम. सँगको कुराकानीमा राज्य मन्त्री तुम्बाहाम्फेले कोरोनाको भाईरस रोकथाम तथा नियन्त्रणका लागि प्रदेश सरकारले स्वास्थ्य सामाग्री उपलब्ध गराएको बताईन् । अस्पतालको निर्माणाधिन ३० बेडको भवनको अनुगमन गर्दै राज्यमन्त्री तुम्बाहाम्फेले गुणस्तरिय भवन निर्माण भएकाले आवश्यक सामाग्री र जनशक्ति उपलब्धताका लागि प्रदेश सरकार प्रतिबद्ध रेहको बताईन् । हिमाली जिल्लामा डाक्टरको पहुँच अनिवार्य पुर्याउने सरकारको योजना रहेकोले सोलुखुम्बु जिल्लामा पनि जनशक्ति व्यवस्थापनमा प्रदेश सरकारले कन्जुस्याई नगर्ने बताईन् ।
अलपत्र स्वास्थ्य कार्यालयका भवनको अनुगमन
सोलुखूम्बुमा निर्माण अलपत्र बनेको स्वास्थ्य कार्यालयको भवन निर्माणको प्रदेश नम्बर १ की सामाजिक विकास राज्य मन्त्री विष्णु तुम्बाहाम्फेले स्थलगत अनुगमन गरेकी छिन् । अनुगमन पछि हिमाल एफ.एम. सँग कुरा गर्दै उनले अलपत्र भवनलाई पुर्णता दिनका लागि पहल गर्ने बताईन् ।
भवन डिभिजन कार्यालय ओखलढुंगाका अनुसार २०७१ साल माघ २० गते दुई करोड ३४ लाख ६७ हजार ४ सय ६८ रुपैयाँमा भवन निर्माणको सम्झौता गरेको निर्माण कम्पनी निलगिरी निर्माण सेवा प्रा.लि.ले पटक पटक म्याद थपेर २०७८ सालमा आईपुग्दा समेत काम सम्पन्न नगरेपछि निर्माण कम्पनीलाई कालो सुचिमा राखिएको छ । निलगिरी निर्माण सेवाले करिब ८० प्रतिशत काम गरेर बाँकी काम अघि नबढाउँदा भवन अलपत्र बनेको छ ।
आधा छानो लगाएको भवनको १६ वटा कोठा र ३ वटा हलसहितको पक्की भवनको छाना, झ्याल, ढोका र फिनिसिङको काम बाँकी रहेको छ । अनुगमनमा प्रहरी नायव उपरिक्षक कवित कट्वाल लगायतको उपस्थिती रहेको थियो । himalsamachar