सोलु सामुदायिक अस्पतालको उद्घाटन

सोलुखुम्बुमा १५ बेडको सोलु सामुदायिक अस्पतालको उद्घाटन गरिएको छ । सोलुदुधकुण्ड नगरपालिका ६ छुल्यामुमा निर्माण गरिएको अस्पतालको आईतबार नगरपालिकाका मेयर नाम्गेल जाङ्बु शेर्पा र उपमेयर गान्धिमाया तामाङले उद्घाटन गरेका हुन् ।

उद्घाटन गर्दै मेयर शेर्पाले नगरपालिकाले स्वास्थ्य क्षेत्रमा निकै फड्को मारेको दाबी गरे । जिल्ला अस्पताल फाप्लुमा सुविधा सम्पन्न भवन निर्माण गरि सेवा प्रवाह सुरु गरेको बताउँदै मेयर शेर्पाले सोलु सामुदायिक अस्पताललाई दिगो सञ्चालनका सन्दर्भमा आफुले सकेको सहयोग गर्ने प्रतिबद्धता व्यक्त गरे ।

सोलुदुधकुण्ड नगरपालिकाका उपमेयर गान्धिमाया तामाङले जिल्लामा विगतको तुलनामा स्वास्थ्य क्षेत्रमा धेरै सुधार भएको बताईन् । कार्यक्रममा अस्पताल संचालक समितिका अध्यक्ष एव. अस्पताल प्रमख डाक्टर राजेन्द्र बस्नेतले ५ वर्षीय कार्ययोजना प्रस्तुत गरेका छन् ।

अस्पतालले १ वर्ष भित्रमा पिएफ.टी फोक्सो रोगको विशेष उपचार विधि, १ महिना भित्रमा डिजिटल एक्स–रे, अपरेसन थिएटर ३ महिना भित्रमा हालको डि ग्रेड ल्याबलाई अपग्रेड गरि बि ग्रेडको ल्याब बनाईने र ३० बेडको अस्पताल बनाईने कार्ययोजना सार्वजनिक गरे ।

त्यस्तै ३ वर्ष भित्रमा मुटुको उपचार, शल्यचिकित्सा, प्रसुति तथा नवजात शिशुको उपचार तथा स्त्री रोग विभाग, डेन्टल विभाग, ईन्डोस्कोपी, क्लोनोस्कोपी,आईसियु र ५० शैयाको अस्पताल बनाउने लक्ष्य छ ।

त्यस्तै, ५ वर्ष भित्रमा सिटि स्क्यान, आईसियु, सिसियु, र डिआईसियु, पारामेडिकल कलेज, र अस्पताल १०० बेडमा स्तरोन्नती गर्ने लक्ष्य रहेको डाक्टर बस्नेतले बताए ।

सोही कार्यक्रममा अस्पताल सञ्चालन समितिका अध्यक्ष एवं अस्पताल प्रमुख डा. राजेन्द्र बस्नेत, समितिका कोषाध्यक्ष एवं अस्पतालका कार्यकारी प्रमुख क्षितिज नकर्मी, सदस्य एवं प्रशासन प्रमुख सुनिता मगर र सदस्य एवं अस्पतालका जेष्ठ नागरिक सहायता कक्ष सम्योजक शंखर बहादुर बस्नेतलाई प्रमुख तथा विशिष्ट अतिथिबाट कार्यसफलताको कामनासहित जिम्मेवारी बहन पत्र हस्तान्तरण गरिएको छ ।