सोलुखुम्बु – ईको हिमाल नेपालले सोलुखुम्बुका चार स्थानीय तहलाई ३५ लाख भन्दा बढिको स्वास्थ्य सामाग्री हस्तान्तरण गरेको छ ।
ईको हिमालले जिल्लाका थुलुङ दुधकोशी, माप्य दुधकोशी, सोताङ र महाकुलुङ गाउँपालिकालाई कोरोना नियन्त्रण र संक्रमितको उपचार सहयोगार्थ ३५ लाख १७ हजारको स्वास्थ्य सामाग्री हस्तान्तरण गरेको ईको हिमाल नेपालका कार्यकारी प्रमुख नारायण ढकालले जानकारी दिए ।
महाकुलुङ गाउँपालिकालाई एन्टिजेन किट दुई सय थान, भिटिएम किट ९० थान, पोटेवल अक्सिजन कन्सन्ट्रेटर दुई थान, फेसशिल एक सय थान, पिपिई सेट २० थान लगायतका १९ प्रकारका स्वास्थ्य सामाग्री सहयोग गरिएको ईको हिमालका प्रशासन तथा सञ्चार व्यवस्थापक केशवराज भूषालले जानकारी दिए ।
ईको हिमालले सोताङ गाउँपालिकामा पिपिई सेट १५०, फेसशिल र सर्जिकल क्याप तीन–तीन सय थान, मास्क, सेनिटाईजर लगायतका २० प्रकारका स्वास्थ्य सामाग्री प्रदान गरेको छ ।
थुलुङ दुधकोशी गाउँपालिकालाई पनि कोरोना नियन्त्रण तथा संक्रमितको उपचारका लागि अति आवश्यकीय सामाग्रीहरु अक्सिजन कन्सन्टेटर, पल्स अक्सिमिटर, सेनिटाइजर, मास्क, पिपिई सेट, एन्टिजेन किट लगायतका १३ प्रकारका स्वास्थ्य सामाग्री प्रदान गरिएको ईको हिमालले जनाएको छ ।
जिल्लाकै माप्य दुधकोशी गाउँपालिकालाई ११ प्रकारका स्वास्थ्य सामाग्री सहयोग गरेको छ । ती सहयोगमा अक्सिजिन कन्सन्ट्रेटर, मास्क, सेटिटाईजर लगायतका सामाग्री रहेका छन् ।
ईको हिमाल नेपालले सिन्धुपाल्चोक र काभ्रेपलान्चोकका विभिन्न स्थानीय तहलाई पनि कोरोना नियन्त्रणमा अति आवश्यक मानिएका स्वास्थ्य सामाग्री सहयोग गरेको छ । दोस्रो भेरियन्ट फैलिएपछि सोलु, सिन्धुपाल्चोक र काभ्रेका विभिन्न स्थानीय तहमा ५४ लाखको सामाग्री हस्तान्तरण गरिएको ईको हिमालका लेखापाल शान्ति जिसीले जानकारी दिईन् ।