सत्ताको होल बडी चेक अप *********
कवि- बलराम तिमल्सिना
देशमा सबैभन्दा बिरामी
जब सत्ता नै हुन्छ
र मुन्टो बटारेर बस्छ जनतासँग
त्यसपछि जरुरी हुने रहेछ
सत्ताको होल बडी चेक अप गर्न !
सत्ताको,सिँगान, खकार, दिसा पिसाव
बिर्य रगत र विभिन्न स्थानका मांसकणहरू
संकलन गरियो र ल्यावमा पठाइयो !
मुटु , कलेजो, फोक्सो, पित्तथैली
आमासय, दुवै आन्द्रा
मलद्वार ,मुत्रद्वार ,
खानाद्वार, घ्राणद्वार -प्राणद्वार
श्रवणद्वार दृश्यद्वार
सबै सबैको जाँच गरियो !
सत्ताको दिसामामा
मान्छेको हड्डीका टुक्राहरू भेटिए
पिसावमा भेटियो
आँसु र रगतको लवण !
आमासयमा भेटिए
लाउडादेखि वाइडबडीसम्मका
लुकाइएका फाइलहरू
ठूलो आन्द्रामा अड्किएको भेटियो
बुढी गण्डकी परियोजना
सानो आन्द्रामा भेटियो
भर्खरै पाठ्य पुस्तकबाट
वाँड्न प्रतिवन्ध लगाइएको
देशको चुच्चे नक्शा !
मिर्गौला जाँच गर्दा
होली वाइनको असर भेटियो
फोक्सोमा दिल्लीको अमिलो हावा
र पित्त थैलीमा भेटियो
एमसिसी कमिशनको ब्रिफकेश !
सत्ताको सातपत्रेमा भेटिए
असंख्य गोप्य संझौताहरू
र विदेशीको तलव खाने
'राष्ट्र सेवक' तथा 'जनसेवक' हरूको नामावली
सत्ताको दिमागमा भेटियो
देशको लागि खतरा मानेर
इन्काउन्टर गर्न तयार मानिसको सूची
र तिनीहरूका ख्याउटे तस्विरहरू !
सत्ताको राष्ट्रवाद एकिन गर्न
डिएनए पनि जाँच गरियो
देशसँग म्याच गरेन डिएनएले
बरु म्याच गर्यो-
चालिस प्रतिशत दिल्ली
तीस प्रतिशत न्यूयोर्क
बीस प्रतिशत बेइजिङ
र दश प्रतिशत इयूसँग !
सत्ताले लगाउने चश्मा
घडी जुत्ता , टेक्ने लौरो
दौरा सुरुवाल र टोपी
सबैबाट डलरको गन्ध आयो !
जाँच दलले परिक्षण सकेको छ
फाइनल रिपोर्ट तयार गर्दै छ
तर ल्यावको बाहिर सत्ताले गस्ती सुरु गरेको छ
ढोकामा केही बन्दूकधारी उभिएका छन्
उनीहरूको हातमा दुइटा पूर्जी छन्
एउटा पूर्जी-
रिपोर्टलाई ढिसमिस पार्ने आदेश
र दोश्रो पूर्जी-आतङ्ककारी घोषणा गर्ने चेतावनी !
जाँच दल चर्को दवामा छ
बिहानसम्ममा नतिजा आउने छ
नतिजा तपाईले अनुमान गरिसक्नु भयो
कि रिपोर्ट सार्वजनिक हुने छ
र जाँच दल आतङ्ककारी मानिने छन्
कि रिपोर्ट ढिसमिस हुने छ
र जाँच दलले गद्दारी गर्ने छन् !
२०७७|०७|०३ भक्तपुर